गुलाबराव देवकरांचा राष्ट्रवादी शरद पवार गटाच्या पहिल्याच यादीत नंबर ! जळगांव ग्रामीण मतदार संघात तुतारीचा आवाज घुमणार !
प्रतिनिधि – विनोद रोकडे
जळगांव – जळगांव ग्रामीण मतदार संघात ‘गुलाब’ नावावर बरीच मते अवलंबून आहेत. या नावभोवती जळगांव ग्रामीण मतदार संघाचे राजकीय वातावरण फिरत असते. आज जळगांव ग्रामीण मतदार संघाचे विद्यमान आमदार गुलाबराव पाटील यांनी आपलं उमेदवारी अर्ज भरला आहे. तर गुलाबराव देवकर यांची उमेदवारी आज राष्ट्रवादी शरदचंद्र पवार गटातर्फे जाहीर करण्यात आली आहे.
गेल्या काही दिवसांपासून शिवसेना ठाकरे गट आणि शरद पवार गटात उमेदवारी वरून रस्सीखेच सुरू असल्याचे बघायला मिळत होते. उमेदवारी कुणाला जाईल यावरून मतदार संघात एकच चर्चा सुरू होती. आज गुलाबराव पाटील यांनी उमेदवारी दाखल करतांना टोला लगावत, “ मी फॉर्म भरला मात्र समोरचा उमेदवार ए बी फॉर्म साठी वाट बघत असल्याची टिका केली होती. त्यातच आज उशिरा शरद पवार गटाची पहिली यादी जाहीर झाली आणि गुलाबराव देवकर यांचे नाव जाहीर करण्यात आले. कालच गुलाबराव देवकर यांनी शिवसेना ठाकरे गटाचे नेते आणि कार्यकर्त्यांची बैठक घेवून समेट घडविल्याचे समजते. त्यानंतर आज त्यांचे नाव जाहीर झाले आहे. गुलाबराव पाटील यांच्या शिवसेनेच्या धनुष्य बाण चिन्हा सोबत आता तुतारी चा आवाज मतदार संघात घुमणार असल्याचे स्पष्ट झाले आहे.
कार्यकर्त्यांमध्ये जल्लोषाचे वातावरण
गेल्या काही दिवसांपासून देवकर निश्चित पण मशाल की तुतारी असा प्रश्न सर्वांना पडलेला होता. मतदार संघात याची एकच चर्चा होत होती. अखेर शिवसेना ठाकरे गट आणि शरद पवार गटात समेट घडल्याने तुतारी वाजणार असल्याचे स्पष्ट झाल्याने राष्ट्रवादी शरद पवार गट आणि शिवसेना ठाकरे गटाच्या कार्यकर्त्यांमध्ये जल्लोष दिसून येत आहे.
