जळगांव ग्रामीण : जळगांव जिल्ह्यात सर्वत्र विधानसभा निवडणुकीचे वातावरण तापले आहे. यातच चाळीसगांव आणि जळगांव ग्रामीण ही दोन मतदारसंघ सोडली तर इतर ठिकाणी सर्वच मतदार संघात बंडखोरी पहायला मिळते. मात्र या दोन्ही मतदार संघात सरळ सरळ लढत होत आहे. जळगांव ग्रामीण या मतदार संघात मंत्री गुलाबराव पाटील आणि माजी मंत्री गुलाबराव देवकर यांच्यात लढत होत आहे. गुलाबराव देवकर यांना मतदार संघातून मोठा प्रतिसाद पहायला मिळत आहे.
यातच गुलाबराव पाटील यांची शिंदे गटाच्या वतीने स्टार प्रचारक म्हणुन नियुक्ती करण्यात आली आहे. गुलाबराव पाटील हे भाषणात पटाईत असल्याने त्यांची सभा शिंदे गटाच्या विविध मतदार संघात लावण्यासाठी सर्वच शिंदे गटाचे उमेदवार इच्छुक राहतील. त्यामुळे त्यांची संपूर्ण महाराष्ट्रात फिरण्याची आवश्यकता शिंदे गटाला भासणार आहे. त्यांची जळगांव ग्रामीण मतदार संघात कमतरता भासू शकते. तसेच गेल्या काही दिवसांपासून प्रतापराव पाटील हे मुख्य चेहरा म्हणून मतदार संघात समोर येत आहेत. या गोष्टींचा विचार करता गुलाबराव पाटील हे प्रतापराव पाटील यांना पुढे करण्याची शक्यता नाकरता येत नसल्याचे मत जाणकार व्यक्त करीत आहेत.
