माजी नगरसेवक विनय (पप्पू) भावे व माजी नगरसेवक भागवत चौधरी स्वीकृत नगरसेवक पदी
धरणगाव, प्रतिनिधी / विनोद रोकडे
धरणगांव नगरपालिकेचे उपनगराध्यक्ष व स्वीकृत सदस्य निवडीसाठी पिठासन अधिकारी तथा लोकनियुक्त नगराध्यक्ष लिलाबाई सुरेश चौधरी यांनी १३ जानेवारी रोजी दुपारी १२ वाजता सभा बोलावली होती. नगरपरिषद अधिनियम १९६५ च्या ५१ अ -१ अ च्या पोटकलम ९ नुसार नगरपरिषद व सदस्य निवडून आल्यानंतर राजपत्रात नावे प्रसिद्ध झाल्याच्या २५ दिवसाच्या आत उपनगराध्यक्ष निवड आणि १ ब नुसार नामनिर्देशित सदस्य निवडीसाठी सभा बोलावणे आवश्यक असते. नगराध्यक्ष या सभेचा पिठासन अधिकारी असतो. उपनगराध्यक्ष निवड कार्यक्रम १३ जानेवारी रोजी दुपारी १२ वाजतानामनिर्देशन देणे व स्वीकारण्याची मुदत होती. नामनिर्देशन पत्रांची छाननी झाली. सभा सुरू झाल्यावर उपनगराध्यक्ष अर्ज स्वीकारण्यात आले. संपूर्ण शहराचे लक्ष लागल्याने अधिकृत उपनगराध्यक्ष कोण होणार ? याकडे सर्वांचे लक्ष लागून होते. यावेळी अतिशय खेळी मेळीच्या वातावरणात प्रभाग क्रमांक १ च्या नगरसेविका सुरेखा विजय महाजन यांचा एकमेव अर्ज असल्याने त्यांना बिनविरोध उपनगराध्यक्ष घोषित करण्यात आले.
माजी नगरसेवकांनाच स्वीकृत ची संधी
धरणगाव नगरपालिकेमध्ये दोन स्वीकृत सदस्य निवडले जाणार होते. त्यात महाराष्ट्र जनविकास आघाडीला एक व शहर विकास आघाडीचा एक स्वीकृत सदस्य नामनिर्देशित अर्ज दाखल करणार होता. यात देखील कोणाचे नंबर लागतात यावर धरणगावकरांच्या नजरा लागल्या होत्या. अनेक कार्यकर्ते पदाधिकारी इच्छुक होते, तर कोणी निष्ठवंत म्हणून दावा करत होते. तर कोणी शब्द दिला आहे, परंतु त्याचा पदरी निराशा आली. यातच दोन्ही आघाडीने माजी नगरसेवक यांनाच संधी दिली. त्यात महाराष्ट्र जनविकास आघाडीने माजी नगरसेवक तथा गटनेते विनय (पप्पू )भावे तर शहर विकास आघाडी ने माजी नगरसेवक तथा शहर प्रमुख भागवत चौधरी यांना संधी देण्यात आली.
